ஸ்ரீஅருட்குருமூர்த்தி துதி

ஸ்ரீஅருட்குருமூர்த்தி துதி

சீர் தருகும் பரமானந்த வடிவமாய்

சின்மயனே – ஜெகன் நாதா

சிந்தை அடங்கிட சிவபதம் அளித்தருள்

தேசிகனே – குருநாதா

என்றும் இல்லா உலகை ஏன் எனக்குக் காட்டியே

ஏங்க வைத்தாய் – ஜெகன்நாதா

நான் அன்றி வேறில்லா தானாகி நின்றிட

நலமெனக்கருள் – குருநாதா

காரணனாய் நின்று கஷ்டஸுகம் தந்து

கலங்கவிட்டாய் – ஜெகன்நாதா

பூரணனாய் உன்னில் கலந்திடச் செய்

பரிபூரணனே – குருநாதா

அந்தகன் போல் யானும் அலைந்தலைந்தும்

உன்னை அடைந்தறியேன் – ஜெகன்நாதா

பந்த பாசங்கள் அற்று பரமாய் நிறந்திடச் செய்

பராபரனே – குருநாதா

தில்லை சிதம்பராம் எல்லையில்லா வெளியில்

நில்லா நடம் புரியும் – பாதா

சொல்லாமல் சொல்லி என்னை சொரூபத்தில்

சேர்த்து வை சேதனனே – குருநாதா

மாயை என்ற பேயை மதித்திடச் செய்தென்னை

மயங்க விட்டாய் – ஜெகன்நாதா

பாயும் சுவாஸம் எல்லாம் பரத்துடன் சேரச் செய்

பரமேச்வரனே – குருநாதா

மதிமயமாய் என்னில் சதிகள் பல செய்யும்

சாச்வதனே – ஜெகன்நாதா

பசு பதி பாசம் என்ற திரைகள் அறுக்கச் செய்

பசுபதியே – குருநாதா

மான்மழுவேந்தியே மாநிலம் காத்து நின்ற

மஹேச்வரனே – விச்வநாதா

நான் என்ற அகந்தை விட்டு தானாகி நின்றிடச் செய்

தாண்டவனே – குருநாதா

அண்டபுவனமெல்லாம் ஆண்டருள் செய்யுமென்

ஆண்டவனே – ஜெகன்நாதா

கொண்டல் போன்ற மும்மலங்களை நீக்கச்செய்

சண்டமாருத – குருநாதா

ஜீவேச்வர ஜகத்தாய் இஹபரம் இரண்டுமாய்

ஏகனாய் நின்ற – ஜெகன்நாதா

ஜீவப்ரஹ்மைக்ய ரகசியம் தெளியச்செய்

ஜீவ பண்டிதனே – குருநாதா

பூதம் ஐந்தால் ஆன கோசங்கள் ஐந்தினுள்

ஜோதியாய் நின்ற – ஜெகன்நாதா

ஸாதகத்தால் பஞ்ச கோசங்கள் அறுத்துன்னை

சந்திக்கச் செய் – குருநாதா

பொறிபுலன்கள் தந்து பேரறிவைக் குறைத்து

பேயனாக்கி வைத்தாய் – நாதா

அறிதற்கு அரிதாகும் ஆறாம் அறிவைத் தந்து

ஆதரித்தருள் – குருநாதா

கண்ணுக்கு கண்ணாய் கண்ணின்றி காணும் உன்னை

காண்பது எங்கண் – ஜெகன்நாதா

காந்தம் இரும்பு போல் கவர்ந்தென்னை விடாமல்

கலந்திடுவாய் – குருநாதா

கெஞ்சியும் கொஞ்சமும் நெஞ்சமிரங்கலையோ

அஞ்சாதே என்றருள் – ஜெகன்நாதா

வஞ்சனையால் வந்த ஸஞ்சிதம் போக்கிவை

குஞ்சிதனே – குருநாதா

அகமதில் நீ இல்லையோ அகந்தை ஏன் வளர்த்திட்டாய்

அச்சுதனே – ஜெகன்நாதா

சுகக்கடல் பொங்கிட சொல்லுணர்வடங்கிட

சுயம்பு ஆக்கிவை –குருநாதா

துப்பறிவில்லாத இப்பிறப்பெனக் கீய்ந்த

ஒப்புயர்வற்ற – ஜெகன்நாதா

ராப்பகல் இல்லாத வெட்ட வெளியில் என்னை

ரமித்திடச் செய் – குருநாதா

ஈன்றிடும் அன்னையிற் பெரிதருள் புரிவோய்

இதுவோ உனதருள் – நாதா

மேன்மேலும் ஆசையை மேவிடச் செய்யாதுன்

தன்மை எனக்கருள் – குருநாதா

வரும் பிறவிகள் மாற்றி தரும் கர்மங்களைப் போக்கி

பெரும் பதம் எனக்கருள் – நாதா

அருட்பெரும் ஜோதியாய் அமர்ந்திடச் செய்

என் குருபரனே – ஞானவரதா.

அருட்பெரும் ஜோதியாய் அமர்ந்திடச் செய்

என் குருபரனே – ஞானவரதா.