ஸ்ரீஆதிபராசக்தி

ஸ்ரீஆதிபராசக்தி

அகணிததாரா கணங்களின் நடுவே

ஆதிபராசக்தி ஆடுகின்றாள்

ஸகல சராசரத்தும் தங்கச் சிலம்பொலிக்க

ஜகதீச்வரியவள் ஆடுகின்றாள்- அவள்

ஜகதீச்வரியவள் ஆடுகின்றாள்

அயனென வருவாள் அனைத்தையும் படைப்பாள்

ஹரியென அளிப்பாள் அரனென அழிப்பாள்

அழிவிலிருந்தும் ஜீவன் பிறந்திடச் செய்பவளாம்

அகிலாண்டேச்வரி ஆடுகின்றாள்- அவள்

அகிலாண்டேச்வரி ஆடுகின்றாள்

அகிலமுழுதும் உள்ள ஆருயிரினங்களும்

ஆழப்பெருங்கடலில் வாழுயிரினங்களும்

அன்றன்று உணவு கொள்ள அத்தனைக்கும் தந்தருளி

அன்னபூர்ணேச்வரி ஆடுகின்றாள்- அவள்

அன்னபூர்ணேச்வரி ஆடுகின்றாள் 

கனக கமலந்தன்னில் கனிந்த சிவப்பொருளைக்

கலந்து பேரின்பங்காட்டும் கனல் வடிவானவளாம்

நானற்ற நல்லோர்க்கெல்லாம் நான் இதோ என்று தோன்றும்

ஞானபரமேச்வரி ஆடுகின்றாள்- அவள்

ஞானபரமேச்வரி ஆடுகின்றாள்

இதயவீணை எழும் இன்னிசையவளே

இருளை அகற்றும் தீப ஜோதியும் அவளே

நாற்பத்து மூன்று கோண நாத மணிமண்டபத்தில்

ஸ்ரீலலிதேச்வரி ஆடுகின்றாள்- அவள்

ஸ்ரீஷோடஸாக்ஷரீ ஆடுகின்றாள்

அழைக்குமுன் வருவாள் அடைக்கலம் அளிப்பாள்

அன்பினுக்குட்படுவாள் அனந்த கல்யாணியவள்

அருட்கவிமாலை பாடும் அகத்தியன் அகத்திலே

அமுத சந்திரேச்வரி ஆடுகின்றாள் – அவள்

ஆனந்த நாடகம் ஆடுகின்றாள் – அவள்

அகஸ்த்யஸித்தேச்வரி ஆடுகின்றாள்.

அகணிததாரா கணங்களின் நடுவே

ஆதிபராசக்தி ஆடுகின்றாள்– அவள்

ஆனந்த நாடகம் ஆடுகின்றாள்.